ቅድስት ሀገር ኢትዮጵያ ባንድ አምላክ በእግዚአብሔር ማመን የጀመረችው ቀዳምዊ ምኒሊክ የአባቱ የሶሎሞንን ሀገር ኢየሩሳሌምን ጎብኝቶ ሲመለስ የሙሴን ጽላትና ካህናተ ኦሪተን፣ በርካታ የብሉይ ኪዳን መጻሕፍትን ከሊቆቻቸው ጋር ወደ ኢትዮጵያ ይዞ ካመጣበት ጊዜ እንደሆነ የታሪክ መዛግብት ይናገራሉ። በተጨማሪም በ586 ዓመት ከጌታ ልደት በፊት ኢየሩሳሌም በባቢሎናውያን በመቃጠሏ ከግዞት የሸሹ እሥራኤላውያን በዮናታን መሪነት ወደግብጽ ከተሰደዱት ተከፍለው ወደ ኢትዮጵያ እንደ መጡ እና ሃይማኖታቸውንና ሥርዓታቸውን እንዳስፋፉ ይነገራል። ሀገራችን ኢትዮጵያ ከክርስትና በፊት ብሉይ ኪዳንን ለመቀበሏ በታሪክ እና በጽሑፍ ከተነገሩት በተጨማሪ የኦሪት ልማዶች በህዝቡ ዘንድ ልማድ እና ባህል ሆኖ መኖሩ አስረጅ ነው። ከእንዚህም ውስጥ በኦሪት እንዳይበሉ የተከለከሉትን እንስሳት እና አዕዋፍ ዛሬም ድረስ አለመብላታችን እንዲሁም የወንዶች ግርዛት ምሳሌዎች ናቸው።

ኢትዮጵያ ክርስትናን የተዋወቀችው በሐዋርያት ሥራ 8፣26 ላይ እንደተገለጠው ኢትዮጵያዊው ጃንደረባ በፊልጶስ በ34 ዓመተ ምህረት ተጠምቆ ወደ ሀገሩ በተመለሰ ጊዜ ነው። በአራተኛው ክፍለ ዘመን የነበረው ታላቁ የቤተ ክርስቲያን ታሪክ ጸሐፊ አውሳቢዮስ “የኢትዮጵያው ጃንደረባ ጥምቀት በዓለም የመጀመሪያው የክርስትና እምነት ፍሬ” ብሎታል። ይሁን እንጂ ክርስትና የመንግሥት እምነት ሆኖ በኤጲስ ቆጶስ ደረጃ መመራት የጀመረው በአራተኛው ክፍለ ዘመን በአክሱም ዘመነ መንግሥት እንደሆነ ይተረካል። ንጉሥ ኤዛና በገንዘቦቹ ላይ የነበሩትን የጨረቃ ሥዕልን ቀይሮ የመስቀል ምልክት በማድረግ በዓለም ከነበሩት ነገሥታቶች  መካከል ቀድምትነትን ቦታ አግኝቷል። በ356 ዓ.ም.  አርያናው ንጉሥ ኮንስታንትዩስ ለአክሱም ንጉሥ ሲጽፍ “ጳጳሱ ፍሬሚናጦስ የክርስትናን እምነት አጥፊ ስለሆነ ወደ ሮም ተይዞ ይላክ”

ይሁን እንጂ ሥርዓተ ክርስትናን በትምህርት ያጠናከረው በእስክንድርያው ፓትርያርክ ቅዱስ አትናቴዎስ በተሾመው በመጀመሪያው የኢትዮጵያ ጳጳስ በፍሬምናጦስ ወይም አባ ሰላማ ነው ። ኢትዮጵያ ከሌሎች በተለየ ብሉይን ከሐዲስ አስተባብራ የያዘች የእግዚአብሔር የምስጢር ሀገር ናት። በመጽሐፍ ቅዱስም ስሟ ከአርባ ጊዜ በላይ ተንስቷል። ለምሳሌ ያህል በነቢዩ ዳዊት «ኢትዮጵያ እጆቿን ወደ እግዚአብሔር ትዘረጋለች» (መዝ. 67(68)፥31) እንዱሁም በኦሪት ዘፍጥረት (ዘፍ 2፥13) “የሁለተኛው ወንዝ ስም ግዮን ነው፣እርሱም የኢትዮጵያን ምድር ሁሉ ይከብባል።” ከመጽሐፍ ቅዱስ በተጨማሪ በአያሌ የታሪክ መዛግብትና መጽሐፍት ላይ ስለ ኢትዮጵያ ተዘግቧል ይገኛል።

የኢትዮጵያ ኦርቶዶክስ ተዋህዶ ቤተ ክርስቲያን ከስድስቱ የኦርየንታል ኦርቶዶክስ ተዋሕዶ አብያተ ክሪስቲያናት ማለትም ከኮፕት (ግብጽ)፣ ህንድ፣ ሶርያ፣ አርመንና ኤርትራ አንዷ ናት። የኢትዮጵያ ኦርቶዶክስት ተዋህዶ ቤተ ክርስቲያን ብዙ ሊቃውንቶችና የተማሩ ቀሳውስቶች ያላት ሲሆን በአሁኑ ጊዜ ቁጥራቸው ከሰላሳ ሺህ በላይ የሆኑ አብያተ ክርስቲያናት ከሦስት መቶ ሺህ በላይ የሚሆኑ ቀሳውስቶችና ወደ አርባ አምስት ሚሊዮን የሚጠጉ ምዕመናን ያላት አገር ስትሆን በዚህም ከምሥራቃውያን የኦርቶዶክስ ሃይማኖት ተከታይ አገሮች በምዕመናን ብዛት የቀዳሚነትን ሥፍራ ይዛለች።

የኢትዮጵያ ኦርቶዶክስ ተዋህዶ ቤተ ክርስቲያን ሦስቱን ዓለም አቀፍ ጉባኤዎችን ብቻ ትቀበላለች እነርሱም የኒቅያው ጉባኤ (325 ዓ.ም.) የኤፌሶን ጉባኤ (381 ዓ.ም.) የቁስጥንጥንያ ጉባኤ (431 ዓ.ም.) ናቸው። ስለዚህ ሁለቱ ጉባኤዎች ያወጧቸው ጸሎተ ሃይማኖትን ተቀብላለች።